Tuesday, 4 April 2017

വേദ പ്രതാപ് മുഖർജിയുടെ മൂന്നു പാപങ്ങൾ (അദ്ധ്യായം 3 )



                     ....................മുഖർജിയുടെ രണ്ടാം പാപം .............

രാമഭദ്രൻ അറസ്റ്റിലായിരിക്കുന്നു മൂന്നാറ്റും കരയുടെ സായന്തനങ്ങളെ പ്രേമ സുരഭിലമാക്കിയിരുന്ന മുന്തിരി ചാറിന്റെ ഉല്പാദകൻ കൊലക്കുറ്റത്തിനു അറസ്റ്റിലായ ശേഷം മൂന്നാറ്റും കരയ്‌ക്കാകെയൊരു ശ്മശാന മൂകതയാണ് . നഷ്ട്ടപെട്ടു പോയ മൂന്നു കന്നാസ് ചാരായത്തിന്റെ പേരിലെന്നല്ല എത്ര കനപ്പെട്ട കാര്യത്തിനു വേണ്ടിയും തന്റെ പ്രിയതമൻ ഒരു കൊലപാതകത്തിനു മുതിരില്ല എന്നു രാമഭദ്രന്റെ ഭാര്യ രമണി ഗ്രാമവാസികളോടു ആണയിട്ടു പറഞ്ഞു . ഇത്തിത്തറയിലെ കെട്ടു വള്ളം മണക്കാനെത്തിയ പോലീസ് നായ മൂന്നു വട്ടംചുറ്റും കൂടി നിന്നവർക്കു നേരെ തിരിഞ്ഞു നിന്നു കുരച്ച ശേഷം വിലക്കപ്പെട്ട കടവിലേയ്ക്ക് പാഞ്ഞു പോയി കായലിന്റെ ആഴങ്ങളിലേയ്ക്ക് നോക്കി നിർത്താതെ കുരച്ചു . ആറ്റിലേയ്ക്ക് നോക്കി കുരയ്ക്കുന്ന നായക്കുട്ടിയെ കണ്ട പരൽമീനുകൾ മുകളിലേയ്ക്കു കുതിച്ചു ചാടി അവന്റെ കുരയ്ക്കൊപ്പം നൃത്തം ചെയ്തു .ആന മറുതയാണിത് ചെയ്തതെന്നു ജനക്കൂട്ടത്തിനിടയിൽ നിന്നും കഴകക്കാരൻ രാമകൃഷ്ണ പൊതുവാൾ ഉറക്കെ ഉറപ്പിച്ചു വിളിച്ചു പറഞ്ഞു . മുതുകിൽ പിടി വീഴുന്നതു കണ്ടതും പൊതുവാളിനു ഇപ്പോൾ അങ്ങനെ പറയേണ്ടിയിരുന്നില്ല എന്നു തോന്നി . പൊതുവാളിന്റെ കോളറിൽ പിടുത്തമിട്ട എ എസ് ഐ ജിനചന്ദ്രൻ അയാളെ ജീപ്പിനടുത്തേയ്ക്കു വലിച്ചു കൊണ്ടു പോയി. ആന മറുതയെ മുൻപെപ്പോഴെങ്കിലും കണ്ടിട്ടുണ്ടോ എന്ന പോലീസ് ചോദ്യത്തിനു മുന്നിൽ അൽപ പ്രാണിയായ പൊതുവാൾ പേടിച്ചു മുള്ളി .
മൂന്നാറ്റും കര ഭഗവതി ക്ഷേത്രത്തിലെ ഉത്സവത്തിനുള്ള കൊടി കയറിയിരിക്കുന്നു മൂന്നാറിന്റെയും തീരത്തുള്ള സകല ജനങ്ങളുടെയും ഉത്സവമാണത് . ബോർജി ഫ്രാൻസിസിന്റെ കൊലപാതകവുമായി ബന്ധിപ്പിക്കത്തക്ക തെളിവുകളൊന്നും കിട്ടാഞ്ഞതിനാൽ എപ്പോൾ വിളിച്ചാലും പോലീസ് സ്റ്റേഷനിൽ ഹാജരാകണമെന്ന വ്യവസ്ഥയിൽ രാമഭദ്രനെ പുറത്തു വിട്ടിരിക്കുന്നു .ഉത്സവ സീസൺ രാമഭദ്രന്റെ കൊയ്ത്തു കാലമാണ് പക്ഷെ ഇക്കുറി പോലീസ് അയാൾക്കു പിന്നാലെ തന്നെ ഉണ്ടാവുമെന്നതിനാൽ മാമ്പുഴക്കരിയിലുള്ള രമണിയുടെ വീട്ടിൽ വളരെ ആസൂത്രിതമായി വാറ്റുന്ന ചാരായം കുപ്പികളിലാക്കി മൂന്നാറ്റും മുഖം ഗ്രാമത്തിലേയ്ക്ക് എത്തിക്കാനാണ് പദ്ധതി . രാമഭദ്രൻ കാഴ്ചക്കാരന്റെ റോളിലും ഭാര്യ രമണി നേരിട്ടു കളത്തിലിറങ്ങിയും നടത്താൻ പോകുന്ന ആദ്യത്തെ ബിസിനസ് സംരംഭം എന്ന നിലയിൽ എത്ര കണ്ടു വിജയകരമാകുമിതെന്നു രാമഭദ്രനു സംശയം ഉണ്ടായിരുന്നു .
ബംഗാളി ഭായി മുഖർജി കഴിഞ്ഞാൽ മൂന്നാറ്റു മുഖം ഗ്രാമത്തിൽ പുറത്തു നിന്നും വന്നു താമസിക്കുന്നത് കഴകക്കാരൻ പൊതുവാളും ഭാര്യ നിർമ്മലാ അന്തർജനവുമാണ് .പാലക്കാട്ടെ ഏതോ അമ്പലത്തിലെ കഴകക്കാരനായിരുന്നപ്പോൾ അവിടുത്തെ പ്രശസ്തമായ അഗ്രഹാരത്തിൽ നിന്നും പ്രണയിച്ചു നാടു വിട്ടവരാണ് രണ്ടു പേരും . കാർമേഘ വർണ്ണനായ രാമകൃഷ്‌ണ പൊതുവാളിന്റെ കൂടെ പാൽ വെണ്മയുള്ള അന്തർ ജനം എങ്ങനെ കൂടി എന്ന സംശയം അന്നാട്ടുകാർ ചോദിച്ചപ്പോഴാണ് ദൂരെ എവിടെയെങ്കിലും തങ്ങളെ രണ്ടു പേരേയുമറിയാത്ത നാട്ടിൽ പോയി ജീവിക്കാമെന്നു പൊതുവാൾ തീരുമാനിക്കുന്നത് . മൂന്നാറ്റും കരയിലെത്തിയിട്ടും പൊതുവാളിന്റെ അന്തർജ്ജനത്തെ ഗ്രാമവാസികളാരും കണ്ടില്ല . മൂന്നാറ്റും കര ഭഗവതിയുടെ ഉത്സവത്തിനു ദീപാരാധന തൊഴാൻ മാത്രമാണവർ പുറത്തേക്കിറങ്ങുന്നത്‌ . ലേശം സംശയത്തിന്റെ അസ്കിത പൊതുവാൾക്കുണ്ടെന്നും ആയതിനാൽ അന്തർജ്ജനത്തെ പുറത്തേക്കിറങ്ങാൻ കൂടി സമ്മതിക്കില്ല എന്നു ഗ്രാമ വാസികൾ പലയിടത്തായി അടക്കം പറഞ്ഞു കേട്ടു .
ആന മറുത ഊരിൽ ഇറങ്ങിയ ശേഷം ഗ്രാമവാസികൾ ആകെ ഭയത്തിലാണ് . ആകെയുള്ള ആശ്രയമായ ഭഗവതിയുടെ മുന്നിൽ അവർ ആവലാതികളുടെ കെട്ടഴിച്ചു വെച്ചു .ഇക്കുറി വെടിക്കെട്ടിനു നിരോധനമുള്ളതിനാൽ ഉത്സവത്തിനു പിരിച്ചെടുത്ത തുക കൊണ്ടു അമ്പലത്തിലേയ്ക്കു നടയിരുത്താൻ ഒരു കൊമ്പൻ എന്ന നിർദേശം കൈയ്യടിച്ചു പാസാക്കപ്പെട്ടു . പറയെടുപ്പിനും എഴുന്നുള്ളിപ്പിനും ഭഗവതിക്കു സ്വന്തമായി ഒരു വാഹനം ഉണ്ടാകുന്നതു നല്ലതാണെന്നു മൂന്നു കരക്കാരും ഒരുമിച്ചു ചേർന്നു തീരുമാനം എടുത്തു . ഉത്സവത്തിനു ഇനി ഏഴു നാൾ, അതിനു മുൻപ് ലക്ഷണമൊത്ത ഒരു കൊമ്പനെ തേടി കമ്മറ്റിയിലെ നാലു പേരെ ത്രിശൂർക്കു പറഞ്ഞയച്ചു .
കൊമ്പു കുഴൽ താലപ്പൊലി ചെണ്ട എന്നു വേണ്ട സകലമാന ആഡംബരത്തോടും കൂടിയാണ് മൂന്നാറ്റും കരയിലേയ്ക്ക് ആ ഗജവീരൻ എഴുന്നുള്ളിയത്. ഏഴുകരകൾക്കു അപ്പുറവും ഇപ്പുറവും സ്വന്തമായി ആനയുള്ള ക്ഷേത്രം എന്ന ഖ്യാതിയിലേയ്ക്ക് മൂന്നാറ്റും കരയും ഉയർന്നിരിക്കുന്നു . ഭഗവതി ഇക്കുറി പ്രസാദിക്കണം ആന മറുതയുടെ ഉപദ്രവത്തിൽ നിന്നും പാവങ്ങളായ ഗ്രാമവാസികളെ രക്ഷിക്കണം . രാമഭദ്രൻ മൂന്നു കുപ്പി റാക്ക് പെരും കായ സഞ്ചിയിലാക്കി അമ്പല പറമ്പിലേയ്ക്ക് തിടുക്കത്തിൽ നടന്നു . സകല ലക്ഷണവുമൊത്ത കൊമ്പൻ രാമഭദ്രൻ വായിലേയ്ക്ക് കമിഴ്ത്തി കൊടുത്ത ചാരായം മൂന്നു കുപ്പിയും ഗ്ലപ്പെന്നു കുടിച്ചു തീർത്തിരിക്കുന്നു . തുമ്പികൈ രാമഭദ്രന്റെ നെറുകയിൽ ചേർത്തു വെച്ചിട്ടു മൂന്നു വട്ടം ഉഴിഞ്ഞു . ഭക്തജനങ്ങൾ കൊണ്ട് വരുന്ന കരിമ്പും കദളിപ്പഴവും ശർക്കരയുമെല്ലാം തിന്നു ഗജരാജൻ തളർന്നിരിക്കുന്നു . ഗ്രാമ വാസികൾക്കു ആദ്യമായി സ്നേഹിക്കാനൊരു ആനയെ കിട്ടിയതിന്റെ ലാളനയേറ്റവൻ മൂന്നാറ്റും കര ഭഗവതിയുടെ തിടമ്പേറ്റാൻ വെമ്പൽ കൊണ്ടു .
ഉത്സവം വന്നു ദീപാരാധന തൊഴാൻ വന്ന പൊതുവാളിന്റെ അന്തർജ്ജനത്തെ കണ്ടു ഗ്രാമവാസികൾ മൂക്കത്തു വിരൽ വെച്ചു . മൂന്നാറ്റും കര വാഴുന്ന ഭഗവതീ വിഗ്രഹത്തിനു പോലും ഇത്രമേൽ ശോഭയില്ലെന്നവർ അവിതർക്കിതമായി പറഞ്ഞു അന്തർ ജനം അമ്പലത്തിൽ നിൽക്കുവോളം .പൊതു വാളിനു ഒരേ ആധിയായിരുന്നു. ആരൊക്കെ അവളെ നോക്കുന്നുണ്ടെന്നയാൾ ചുഴിഞ്ഞു ചുഴിഞ്ഞു നോക്കി കൊണ്ടു പിറകെ നടന്നു . മുഖർജി ഇക്കുറി ഉത്സവത്തിനു പോലും പുറത്തേക്കിറങ്ങിയില്ല അങ്ങനെ ഒരാൾ ഈ നാട്ടിൽ ജീവിക്കുന്നു എന്നു പോലും ഗ്രാമവാസികൾ മറന്നിരിക്കുന്നു . രാമഭദ്രൻ മൂന്നുകുപ്പി ഭഗവതിയെ പ്രതി അമ്പല കൊമ്പനു കൊടുക്കുന്നതു പതിവായിരിക്കുന്നു. സകല വിഗ്ന നിവാരിണിയായ ഗണേശന്റെ പുനരവതാരമാണ് അമ്പലത്തിൽ വന്ന ആന എന്നയാൾ ചാരായം കുടിക്കാൻ വന്ന ഗ്രാമ വാസികളോടെല്ലാം പറഞ്ഞു .
ഉത്സവ കഴകം കഴിഞ്ഞു വീട്ടിലേയ്ക്കു മടങ്ങിയ പൊതുവാൾ ഇതുവരെ വീട്ടിലെത്തിയിട്ടില്ല . നിർമ്മലാ അന്തർജ്ജനം പുറത്തേയ്ക്കിറങ്ങി അന്വേഷിക്കണോ വേണ്ടയോ എന്നു ശങ്കപ്പെട്ടു വീടിനുള്ളിൽ വെരുകിനെപ്പോലെ ഓടി നടന്നു . ഉത്സവ ഷീണം കഴിഞ്ഞു മയക്കത്തിലായ മൂന്നാറ്റും കരയിലേയ്ക്കു ആ വാർത്ത വെള്ളിടി പോലെ വന്നു വീണു . അമ്പല പറമ്പിലെ പേരാലിൽ കഴകക്കാരൻ രാമ കൃഷ്ണ പൊതുവാൾ തൂങ്ങിയാടുന്നു ...
തുടരും ,,,,
Post a Comment