Thursday, 14 December 2017

കല്യാണ സൗഗന്ധികം



പ്രിയപ്പെട്ട സുധാകരൻ  ചേട്ടന് ,

ഇങ്ങനെയൊരു കത്തു കിട്ടുമ്പോൾ ചേട്ടൻ പുരികം മേൽപ്പോട്ടുയർത്തി മടക്കി കുത്തിയ മുണ്ടു മോളിലോട്ടു തെറുത്തു തുടയിൽ തടവി ആരാണിപ്പാ നമക്കിങ്ങനെ ഒരു കത്തയക്കാനുള്ളതു  എന്നു ചിന്തിച്ചു ഉത്തരം നോക്കി നിൽക്കുമെന്നു ഞാൻ ഊഹിക്കുന്നു.സംശയിക്കേണ്ടാ ഇതു സുധാകരൻ ചേട്ടനുള്ള കത്തു തന്നെയാണ് ഒരു പാടു ദൂരെ ചേട്ടനറിയാത്ത ചക്രവാളത്തിലും ചേട്ടനെ സ്നേഹിക്കുന്നവർ ഉണ്ടെന്ന തോന്നൽ ചേട്ടനു സമ്മാനിക്കാൻ ഇങ്ങനെ ഒരു കത്തെഴുതണമെന്നു എനിക്കു തോന്നി. ഈ ഞാൻ ആരാണെന്നല്ലേ ചേട്ടൻ ഇപ്പോൾ ആലോചിക്കാൻ തുടങ്ങുന്നത് ഞാൻ ചേട്ടന്റെ നന്മ മാത്രം ആഗ്രഹിക്കുന്ന ചേട്ടന്റെ ഒരു അഭ്യുദയ കാംക്ഷി എന്നു മാത്രം തൽക്കാലം അറിയുക ഇനി വിഷയത്തിലേയ്ക്കു വരാം .

ആവണിപ്പാടത്തു നിന്നും വന്ന ഒരാലോചന ചേട്ടന്റെ മകൾ സുധാമണിക്കു ഏതാണ്ടു ഉറപ്പിച്ച മട്ടിലാണല്ലോ . നല്ലതു തന്നെ  ഏതൊരപ്പന്റെയും ഉറക്കം കെടുത്തുന്ന വിഷയമാണ്   പ്രായപൂർത്തിയായി വീട്ടിൽ നിൽക്കുന്ന പെണ്മക്കൾ . അവർക്കു ചേർന്ന വരനെ കണ്ടെത്താൻ ഉത്തരവാദിത്വമുള്ള ഏതൊരപ്പനെയും പോലെ ചേട്ടനും ശ്രമിച്ചിട്ടുണ്ട് അതാണാല്ലോ ആവണിപ്പാടത്തു നിന്നും വന്ന ആലോചന ഉറപ്പിക്കാൻ നിങ്ങൾ തീരുമാനിച്ചതും .

ഇനി എഴുതാൻ പോകുന്ന കാര്യങ്ങൾ തീർത്തും രഹസ്യമാണ് ഈ കത്തു വായിക്കുന്ന ചേട്ടനും ഞാനുമല്ലാതെ മൂന്നാമതൊരാൾ അറിയാൻ പാടില്ലാത്ത പരമരഹസ്യം . സുധാമണിക്കു വേണ്ടി ആലോചിച്ചുറപ്പിച്ച പയ്യൻ  രാകേഷ് ഒരു കൊലപാതകിയാണ് . അധികം ആരും അറിഞ്ഞിട്ടില്ലാത്ത അധികമാരുമല്ല ഞാനും രാകേഷും   അല്ലാതെ  ഈ വിവരം അറിയുന്ന മൂന്നാമതൊരാൾ ചേട്ടനാണ്. ഈ കത്തു ചേട്ടൻ അധികൃതരെ ഏൽപ്പിക്കുമെന്ന ഭയമൊന്നും എനിക്കില്ല കാരണം താങ്കളുടെ മകളുടെ ഭാവിയെക്കരുതി ഞാൻ പറയുന്ന നല്ല കാര്യത്തിനു അതിന്റേതായ ഗൗരവം ചേട്ടൻ കൊടുക്കുമെന്നു ഞാൻ മനസ്സിലാക്കുന്നു .ഇന്നല്ലെങ്കിൽ നാളെ ഞങ്ങൾ രണ്ടു പേരും പിടിക്കപ്പെടും അതുറപ്പാണ് ഈ സത്യം അറിഞ്ഞു കൊണ്ടു ചേട്ടൻ ഇനിയും ഈ ബന്ധം തുടരാൻ തീരുമാനിച്ചാൽ മകളോടുള്ള സ്നേഹക്കുറവായേ എനിക്കതിനെ കാണാൻ കഴിയൂ .

കത്തിനോടൊപ്പം വെച്ചിരിക്കുന്ന ഫോട്ടോയിൽ കാണുന്ന ശ്യാം ലാലെന്ന യുവാവിനെപ്പറ്റി ആവണിപ്പുറത്തൊന്നു അന്വേഷിച്ചു നോക്കുക .കഴിഞ്ഞ വിഷു മുതൽ ഇയാളെ  നാട്ടിൽ നിന്നും കാൺന്മാ നില്ല . നാട്ടുകാരും വീട്ടുകാരും ഇയാൾ എങ്ങോ നാടു  വിട്ടു പോയെന്ന വിശ്വാസത്തിലാണ് കഴിയുന്നത് എന്നാൽ സത്യമതല്ല കഴിഞ്ഞ വിഷുവിന്റെ തലേന്നു കൂട്ടു  കൂടി മദ്യപിക്കുന്നതിനിടയിൽ ഉണ്ടായ കശപിശയിൽ ശ്യാംലാലിനെ അങ്ങയുടെ മകളുടെ പ്രതിശ്രുത വരൻ രാകേഷ് കൊലപ്പെടുത്തുകയായിരുന്നു . കള്ളു തലയ്ക്കു പിടിച്ചു കഴിഞ്ഞാൽ അവനൊരു മൃഗമാണ് .ഞാൻ പല തവണ ഉപദേശിച്ചിട്ടുള്ളതാണ് ആ സംഭവത്തിനു ശേഷം ഇപ്പോൾ എനിക്കവനുമായി എനിക്കു യാതൊരു ബന്ധവും ഇല്ല .

ഇനിയും വിശ്വാസമായില്ലെങ്കിൽ  ഒരു സത്യവും കൂടി ഞാൻ തുറന്നെഴുതാം കൊല്ലപ്പെട്ട ശ്യാംലാലിന്റെ മൃതദേഹം രാകേഷിന്റെ വീട്ടിലെ സെപ്റ്റിക്ക് ടാങ്കിനുള്ളിൽ അസ്ഥിപഞ്ചിരമായി ഇപ്പോഴും അവശേഷിക്കുന്നുണ്ടാവാം . ഇത്രയും പരത്തി എഴുതി ഒരപരിചിതയുടെ കല്യാണം മുടക്കാൻ ഞാൻ തുനിഞ്ഞത് അങ്ങയോടുള്ള സഹതാപവും അങ്ങയുടെ മകൾ സുധാമണിയോടുള്ള അദമ്യമായ സ്നേഹവും കൊണ്ടാണ് . ദയവു ചെയ്തു ചേട്ടൻ ആവണിപ്പടത്തെ കല്യാണ  ആലോചനയുമായി മുന്നോട്ടു പോകാതിരിക്കുക .

ഒരു പാടു ഉത്കണ്ഠകളോടെ

ഒരഭ്യുദയ കാംഷി

Tuesday, 12 December 2017

മൗനം


നമ്മൾക്കിടയിൽ ഇങ്ങനെയൊരു സംസാരം ആവശ്യമുണ്ടോ ? മേത്ത മൂന്നാം പ്രാവശ്യം അതു പറഞ്ഞു കഴിഞ്ഞതും അടി പൊട്ടി
സാലെ ഇന്ത്യൻ കുത്താ ,ചില്ലാത്തെ തും
അടി കൊള്ളുന്നതും കൊടുക്കുന്നതും ഇന്ത്യക്കാരൻ ആണെന്നായിരുന്നു എന്റെ അതു  വരെയുള്ള വിശ്വാസം .
ഞാൻ എഴുന്നേറ്റു കട്ടിലിൽ ഇരുന്നു .കുറെ നേരമായി ചെവി തിന്നുന്ന സംസാരത്തിൽ ശ്രദ്ധിക്കാതിരിക്കാനാണ് എയർ ഫോൺ കാതിൽ തിരുകി സുബ്ബലഷ്മിയുടെ പാട്ടിൽ ലയിച്ചത് .അടി പൊട്ടിയപ്പോൾ എനിക്കെഴുന്നേൽക്കാതിരിക്കാൻ ആയില്ല .
അരെ ക്യാ ഹോരെ !! ഞാൻ അടി കൊണ്ടു ചുവന്ന കവിളു തടവി കുട്ടിയെപ്പോലെ കരയുന്ന മേത്താജിയെ താടിയിൽ പിടിച്ചു മേലോട്ടുയർത്തി .
സാഗ്മ ഒറ്റാബുദ്ധിക്കാരനാണ് ,അധികം സംസാരം ആരോടുമില്ല ,പതിവായി കിടക്കാൻ മാത്രമേ മുറിയിൽ വരൂ നേരത്തെ വന്നാൽ ഇമ്മാതിരി ചില ശണ്ഠകൾ പതിവാണ് .പല തവണയായി ഇങ്ങോരോട് റൂം മാറാൻ ഞങ്ങൾ ആവശ്യപ്പെടുന്നു . നോർത്ത് ഈസ്റ്റ് ഫ്രോണ്ടിയറിൽ നിന്നുള്ള ഇന്ത്യക്കാരനാണ് സാഗ്മ പക്ഷെ അയാളുടെ വാദം അയാൾ ചൈനക്കാരൻ ആണെന്നാണ് അരുണാചൽ പ്രദേശിലെ ഒരു ഭാഗം ഇന്ത്യ കൈയ്യടക്കി വെച്ചിരിക്കുന്നു എന്നതാണയാളുടെ ഞങ്ങളോടുള്ള വെറുപ്പിന്റെ ഹേതു .

സാഗ്മ പുറത്തേയ്ക്കു പോയി , മേത്താജി കരച്ചിൽ നിർത്തിയെങ്കിലും വൃണിത ഹൃദയവുമായി കട്ടിലിനു കീഴെയിരുന്ന പെട്ടികൾ വലിച്ചു പുറത്തെടുത്തു തുണികൾ തിടുക്കത്തിൽ തള്ളികയറ്റി .

നിങ്ങളിതെന്തു ഭാവിച്ചാ കമ്പനി നമുക്കു മൂന്നു പേർക്കും  കൂടി അനുവദിച്ച റൂമാ ,അവൻ ഇന്ത്യക്കാരൻ അല്ലെങ്കിൽ അവൻ വിട്ടു പോകട്ടെ ഈ റൂം ഞാൻ മേത്താജിയെ പൂണ്ടടക്കം പിടിച്ചു .

നമുക്കു ഒരുമിച്ചു പരാതിപ്പെടാം !

നീ വരുമോ ? മേത്ത എന്നെ സംശയത്തോടെ നോക്കി ,

ങ്ങും ! ഞാൻ തലയാട്ടി .

മാനേജർ സ്റ്റാർക്കി കർക്കശക്കാരനായ വെള്ളക്കാരനാണ് , വംശീയത പറഞ്ഞു ചെന്നാൽ അയാൾ ടെർമിനേഷൻ  അടിച്ചു കയ്യിൽ തരുമെന്നത് കട്ടായം !

വിറച്ചു വിറച്ചു ഞങ്ങളാ വിഷയം സ്റ്റാർക്കിയുടെ മുന്നിൽ അവതരിപ്പിച്ചു .

സാർ സാഗ്മയുടെ കൂർക്കം വലി അസഹ്യമാണ് ഞങ്ങൾക്കുറങ്ങാൻ കഴിയുന്നില്ല !ഞങ്ങളെ മറ്റൊരു റൂമിലേയ്ക്ക് മാറ്റണം  !!!!! മുൻപു റിഹേഴ്സൽ എടുത്ത വിഷയങ്ങളിൽ ഇല്ലാതിരുന്ന പുതിയ വിഷയം വിശ്വസനീയമായ രീതിയിൽ അവതരിപ്പിച്ച  എന്നെ മേത്ത ആത്മ വിശ്വാസത്തോടെ നോക്കി .

സ്റ്റാർക്കി ഞങ്ങളെ രണ്ടു പേരെയും മാറി മാറി നോക്കി , മനുഷ്യാവകാശങ്ങൾക്കു വില കൽപ്പിക്കുന്നവരാണ് ഇക്കൂട്ടരെന്നു കേട്ടിട്ടുണ്ട് .

ഓകെ ,നാളെ മുതൽ സാഗ്മ വേറൊരു മുറിയിലേയ്ക്കു മാറുകയാണ് പകരം മറ്റൊരാൾ നിങ്ങളുടെ മുറിയിലെത്തും  ആർ യു ഹാപ്പി വിത്ത് ദാറ്റ് !!

വെരി മച്ച് ഹാപ്പി സാർ , ഞങ്ങൾ സന്തോഷത്തോടെ പുറത്തിറങ്ങി .

ഞങ്ങൾ റൂമിലെത്തും മുൻപു സാഗ്മ കിടക്കയും തൂക്കി പുതിയ റൂമിലേയ്ക്ക് പോയി .

ഒഴിഞ്ഞ ബെഡിൽ പിറ്റേന്നു മുതൽ താമസിക്കാൻ ആറരയടി പൊക്കവും കരിവീട്ടി മസിലുമുള്ള ഒരജാന ബാഹുവായ മനുഷ്യനെത്തി അയാൾ സ്വയം പരിചയപ്പെടുത്തി .

ഞാൻ ബശാറത്ത് ഖാൻ , കാശ്മീരിൽ നിന്നു വരുന്നു .ശേഷം ഒരു കനത്ത മൗനം വാക്കുകൾക്കിടയിൽ കടന്നു വന്നു ഞാനും മേത്തയും പരസ്പരം മുഖത്തോടു മുഖം നോക്കി . മൗനം മുറിഞ്ഞു ആജാനബാഹു പിന്നെയും വാ തുറന്നു

നിങ്ങളുടെ ഇന്ത്യ കൈയ്യടക്കി വെച്ചിരിക്കുന്ന കാശ്മീരല്ല , സ്വതന്ത്ര കാശ്മീർ പാകിസ്ഥാൻ സർവ്വ സ്വാതന്ത്രവും നൽകുന്ന കാശ്‌മീർ  !!!

മേത്താജി കവിളിൽ തടവി പതിയെ കട്ടിലിലേയ്ക്കു നടന്നു ,ഞാൻ എന്റെ കിടക്കയിലേയ്ക്കും പിന്നെയവിടെയാകെ  മൗനമായിരുന്നു ചീവീടുകൾ ചിലയ്ക്കാത്ത താഴ്വരയിലെ പേടിപ്പിക്കുന്ന മൗനം  പോലെ  ഭീകരമായ മൗനം .........

Wednesday, 6 December 2017

അഞ്ചു ഹൈക്കൂ കവിതകൾ




1 , പരാഗണം

നുണ പരാഗണം ചെയ്യുന്ന
പരപരാഗിയായി മനുഷ്യൻ മാറിയത്
നവമാധ്യമ വിപ്ലവത്തിനു പിന്നാലെയാണ് .

2 , പുരുഷത്വം

പതിനാലാം സെക്കന്റിനു മുമ്പ്
പ്രജ്ഞയെ തിരികെയെടുക്കാൻ
കഴിയുന്നുവെന്നതാണെന്റെ പുരുഷത്വം.

3 , വിശപ്പ്

ആഗ്നേയ ഗ്രന്ധികൾ
അവിരാമം പണിയെടുക്കുന്നതിനാൽ
നഷ്ട്ടപ്പെട്ട വികാരമാണ് വിശപ്പ് .

4 , ചെരിപ്പ്

തേഞ്ഞു തീർന്നിട്ടുമെന്റെ പാദം
പാതവക്കിലുടക്കാതെ കാത്തവളെ
പ്രിയതരം നിന്റെ അത്യുദാരത .

5 , പരിണാമം

പരിണമിച്ചുണ്ടായതിനെ
പരിഹസിച്ചിരുന്നു ഞാൻ
പ്രതിശ്ചായ അറിയും വരെ .

Friday, 1 December 2017

അന്ധൻ




നഗ്ന നേത്രനായി
ഞാനിപ്പോൾ
സഞ്ചരിക്കാറേയില്ല

എപ്പോഴുമൊരാവരണം
എന്റെ കാഴ്ചകൾക്കിടയിൽ
മധ്യസ്ഥനെപ്പോലെയുണ്ടാവും

തലകിഴുക്കനേ
റെറ്റിനയിൽ പതിയും മുൻപ്
എനിക്കു വേണ്ടപ്പെട്ടവയേതെന്നു
വേഗം തിരിച്ചറിയുന്നൊരാവരണം

തിരിച്ചറിവുകൾ
ഉണ്ടാവുന്നതു കൊണ്ടാവണം
ചിലരെന്നെ അന്ധനെന്നു
വിളിക്കുന്നു .

Thursday, 30 November 2017

100 % ഷോക്ക് പ്രൂഫ്



തരംഗ ദൈർഘ്യം കുറഞ്ഞ
ചാലകങ്ങളാൽ
നിർമ്മിക്കപെട്ടവനാണ് ഞാൻ
 ഒരു പ്രവേഗവും
അതിവേഗമെന്നെ
ഉയർത്തുകയോ
തളർത്തുകയോ
ചെയ്യുന്നില്ല
ധൈര്യമായി
നിങ്ങൾക്കെന്നെ
കടന്നു പിടിക്കാം
100 % ഷോക്ക് പ്രൂഫ്

Wednesday, 29 November 2017

അഞ്ചു ഹൈക്കൂ കവിതകൾ




1 ,
കഷ്ട്ടപ്പെട്ടു നേടിയതിനോടുള്ള
കടുത്ത ഇഷ്ട്ടം കൈയ്യിലായ മാത്ര
നഷ്ട്ടപ്പെട്ട ദുഃഖത്തിലാണ് ഞാൻ .

2 ,

ഗഗനമാണെന്റെ വാജ്ഞ
ഗഹനമാണെന്റെ ചിന്ത
ഗതികേടിലാണു ഞാൻ.

3 ,

കുരിശിന്റെ വഴികളിൽ
കൂവാൻ കൊതിച്ചെത്ര
കോഴികൾ കാക്കുന്നു.

4 ,

കൂനിനുള്ളിലെ
കാളകൂടം കൊണ്ടു
കുടുംബം പകുത്തവൾ നീ മന്ഥര .

5 ,

മുന്നിലാകുമ്പോഴും
പിന്നെയും ചെല്ലേണ്ട
വിഷമ വൃത്തത്തിലെൻ ഘടികാരസൂചി. 

Tuesday, 28 November 2017

നിങ്ങളെന്നെ കണ്ടുവോ ?



എന്നെയെവിടെയോ
നഷ്ട്ടമായിരിക്കുന്നു
ഞാൻ തിരയുകയാണ്
നിങ്ങളെന്നെ കണ്ടുവോ ?

നന്മ നിറഞ്ഞ നാട്ടു വഴികളിൽ
മരുഭൂമിയുടെ ഊഷരതയിൽ
പാതി വെന്ത സൗഹൃദങ്ങളിൽ
ധ്യാന നിമഗ്നമാർന്ന വിശുദ്ധതയിൽ
അർദ്ധനാരീശ്വരിയുടെ പ്രണയത്തിൽ
ചിതലരിക്കുന്ന ചിന്തകളിൽ
മത്തു പിടിപ്പിക്കുന്ന ലഹരികളിൽ
സർഗാത്മകതയുടെ സ്‌ഫോടനങ്ങളിൽ
ഉത്കണ്ഠയുടെ  വ്യസനപർവ്വങ്ങളിൽ
 ഭൂതത്തിന്റെ നഷ്ടബോധങ്ങളിൽ
വർത്തമാനത്തിന്റെ വ്യഥകളിൽ
ഭാവിയുടെ തുറിച്ചു നോട്ടങ്ങളിൽ

ഞാൻ എന്നെ തിരയുകയാണ്
നിങ്ങളിലാരെങ്കിലും
എവിടെവെച്ചെങ്കിലും
എന്നെ കണ്ടു മുട്ടിയാൽ
ദയവായി അടുത്ത
പോലീസ് സ്റ്റേഷനിൽ അറിയിക്കുക

Monday, 27 November 2017

മിഥ്യകളിൽ മിഥ്യ



ആദ്യമായി നിന്നെ കാണുമ്പോൾ ആകാശം ചുവന്നിട്ടായിരുന്നു ഏഴുവർണ്ണങ്ങളും വിരിച്ചൊരു മഴവില്ലവിടുണ്ടായിരുന്നു ആൺ മയിലുകൾ എന്തെന്നില്ലാത്ത ആനന്ദത്തിൽ നൃത്തമാടുന്നുണ്ടായിരുന്നു എല്ലാ ശകുനനപ്പിഴകൾക്കു മുന്നെയും ചില ലക്ഷണമൊത്ത ശകുനം കണ്ണുകളെ കുളിരണിയിക്കുമെന്നതു കളവല്ലെന്ന സത്യം ഞാനിന്നു തിരിച്ചറിയുന്നു സഖേ മിഥ്യ , സകലതും മിഥ്യ മിഥ്യകളിൽ മിഥ്യ

Saturday, 9 September 2017

വിസ വരുമോ ????

ആകാശത്തു പൊട്ടു പോലെ കാണുന്ന ആ  നക്ഷത്രങ്ങളെ നോക്കി നീ നേന്ത്ര പഴങ്ങളെന്നു പറഞ്ഞാലും ഞാൻ തലകുലുക്കി സമ്മതിക്കും ലിജീ, കാരണം നീയിപ്പോൾ ശരീരവും ഞാൻ ആത്മാവുമാണ് .ആത്മാവിനു ആഗ്രഹിക്കാൻ മാത്രമേ കഴിയൂ നടപ്പാക്കേണ്ടത് ശരീരമാണ് . മാസാവസാനം നീ തരുന്ന നാരങ്ങാ വെള്ളം ചേർത്ത നാടൻ വോഡ്കയുടെ ലഹരിയിൽ ആയിരിക്കുമ്പോൾ മാത്രമാണ് ഞാൻ അൽപ്പമെങ്കിലും സ്വാതന്ത്രനാകുന്നത് . രണ്ടു പെഗ്ഗിൽ മസ്തിഷ്‌കത്തിന്റെ മധുമൂക്കോലപോലും നനയില്ലെങ്കിലും നിന്നിൽ നിന്നും ഞാൻ സ്വത്രന്ത്രനായി എന്ന തോന്നൽ തരാൻ ആ മധുരാ ചഷകത്തിനു കഴിയുന്നുണ്ടന്നതേ മഹാ ഭാഗ്യം . സ്വാതന്ത്യ്രം അമൃതാണെന്നു പാടിയ കവികളെ എനിക്കിപ്പോൾ ഒരു ബഹുമാനവും ഇല്ല .പാരതന്ത്ര്യത്തിന്റെ ബന്ധനം ഒരു നിമിഷം പോലും അനുഭവിക്കാതെ ഭാവനയിൽ വിരിഞ്ഞ വരികളെ പേപ്പറിലാക്കിയ കൂശ്മാണ്ടങ്ങൾ .

ഇത്രയും വായിച്ചപ്പോൾ നിങ്ങൾ വിചാരിച്ചിട്ടുണ്ടാവും ഞങ്ങളുടെ ദാമ്പത്യം അപ്പാടെ നിലവിളി ശബ്ദം മുഴക്കി വരുന്ന ആംബുലൻസിനായി കാത്തു കിടക്കുകയാണെന്ന് .എന്നാൽ തെറ്റി ഒരു രാത്രി പോലും ലിജിക്കെന്നെയും എനിക്കു ലിജിയെയും കാണാതെ കഴിയാൻ കഴിയുമോയെന്നു സംശയമാണ് . പിന്നെ ഒരു കീഴടങ്ങൽ അതു ഞങ്ങളുടെ വിവാഹമെന്ന കൂദാശ ആശിർവദിച്ച വികാരിയച്ചൻ  പറഞ്ഞു പഠിപ്പിച്ച പ്രാർത്ഥനകളിൽ ഒന്നാണ് പരസ്പരം  കീഴടങ്ങി ജീവിക്കണമെന്നത് . ഇപ്പോൾ കുടുംബത്തിലെ ഏക വരുമാനക്കാരി  അവളായതു കൊണ്ടും എനിക്കു പ്രത്യേകിച്ചു തൊഴിലൊന്നും ഇല്ലാത്തതിനാലും  ഞാൻ സഭ ക്രിസ്തുവിനു കീഴ്പെട്ടിരിക്കുന്നതു പോലെ സ്വതന്ത്രമായ മനസ്സോടെയും പൂർണ്ണമായ സമ്മതത്തോടെയും  അവൾക്കു കീഴ്പ്പെട്ടിരിക്കുന്നു .

അയൽക്കൂട്ടത്തിലെ ചാക്കോച്ചിക്കും ഷൈജപ്പനും എന്നോടൊരു ഇറെവറൻസ് ഉണ്ടെന്നു എനിക്കു പലപ്പോഴും തോന്നിയിട്ടുണ്ട് കാരണം അവരുടെ കൂടെ ഷെയർ  ഇട്ടടിക്കാൻ ഞാൻ നിൽക്കാത്തതു കൊണ്ടു തന്നെ .ലിജിയുടെ പാവാട ചരടിൽ ആണെന്റെ ജീവിതം എന്നവർ ഒളിച്ചും പാത്തും പലയിടത്തും പറഞ്ഞാതായി ഞാൻ അറിഞ്ഞു ,മറുപടി പറയേണ്ട വിഷയമല്ലാത്തതിനാൽ ഞാൻ ഇടപെടാനെ പോയിട്ടില്ല . ഷൈജപ്പന്റെ ഭാര്യ ലൂസിയമ്മയ്ക്കു എന്നോട് കടുത്ത ആരാധനയും അസൂയയും ഉണ്ടെന്നും അതു  കൊണ്ടാണ് ഷൈജപ്പൻ എനിക്കെതിരെ പ്രവർത്തിക്കുന്നതെന്നും എനിക്കു നന്നായി അറിയാം . ലൂസിയമ്മ റവന്യു വകുപ്പിലെ ഹെഡ് ക്ളാർക്കാണ് പറഞ്ഞിട്ടെന്താ കാര്യം, രാവിലെ കുട്ടികളെ സ്കൂളിൽ വിടുന്നതു മുതൽ സകല വീട്ടുജോലികളും തനിയെ ചെയ്യണം ഷൈജപ്പൻ കള്ളൂ  കുടിച്ചു നടക്കുന്നതല്ലാതെ അടുക്കളയിലേയ്ക്കു തിരിഞ്ഞു പോലും  നോക്കില്ലത്രേ ! അങ്ങനെയുള്ള കെട്ടിയോനുള്ള പെണ്ണുങ്ങൾക്കു എന്നെപ്പോലെ അച്ചടക്കമുള്ള ഭർത്താക്കന്മാരെ കാണുമ്പോൾ  ആരാധനയുണ്ടാകുക സ്വാഭാവികം.

കാലാവസ്ഥ വകുപ്പിൽ  ജോലി  ചെയ്യുന്നതു കൊണ്ടാണോ എന്തോ ലിജിയുടെ സ്വഭാവവും എപ്പോഴും മാറി മറിഞ്ഞിരിക്കും . ചിലപ്പോൾ മഞ്ഞു  പോലെ നൈർമ്മല്യമുള്ളതും ചിലപ്പോൾ കൊടുങ്കാറ്റു പോലെ പ്രഷുബ്ദവും ചിലപ്പോൾ നല്ല മഴപെയ്തിറങ്ങിയ ശാന്തതയും തണുപ്പും എല്ലാ കാലാവസ്ഥയിലും  ഏഷ്യൻ പെയിന്റ് പോലെ ഞാൻ ഭിത്തിയോടിണങ്ങി മഴയും വെയിലും കാറ്റുമേറ്റു മുന്നോട്ടു പോകവേ അബുദാബിയിൽ നിന്നും മൂത്ത ചേട്ടന്റെ ഇടിമിന്നലു പോലുള്ള വിളി വന്നു  . അബുദാബിയിൽ ചേട്ടന്റെ കൂടെ താമസിച്ചിരുന്ന അമ്മച്ചി പ്രായാധിക്യത്തെ തുടർന്നു നാട്ടിലെ എന്റെ വീട്ടിൽ താമസിക്കാൻ വരുന്നു .  കാലാവസ്ഥയിൽ പല പ്രതികൂല മാറ്റങ്ങളും ഉടൻ ഉണ്ടാകാൻ പോകുന്നെന്ന പ്രവചനം കേട്ടതും   ലിജി ഇടവപ്പാതിയിലെ ഇടിമിന്നൽ പോലെ ജ്വലിച്ചു മഹാമാരി പോലെ  പെയ്തിറങ്ങി. രണ്ടു മക്കളിൽ ഇളയവനായ താനാണ് അമ്മച്ചിയുടെ അവസാന കാല സംരക്ഷകൻ എന്ന ഉത്തമബോധ്യം അച്ചികോന്തനായിട്ടും അമ്മച്ചിയെ കൈവിടാൻ തന്നെ അനുവദിക്കുന്നുമില്ല .

ആറും അറുപതും ഒന്നാണെന്നു പണ്ടുള്ളവർ പറയുന്നതു വെറുതെയല്ല ,അമ്മച്ചി വന്ന അന്നു മുതൽ ശംഖുനാദം മുഴങ്ങി മരുമോൾ അധ്വാനിച്ചു കൊണ്ടു  വരുന്നതിൽ പാതിയാണ് താൻ പെറ്റു വളർത്തിയ മകനും ഞാനും വെട്ടി വിഴുങ്ങുന്നതെന്നുപോലും ഓർക്കാതെയുള്ള വെല്ലുവിളികളിൽ യുദ്ധഭൂമിയിൽ പലതവണ മുഴങ്ങിക്കേട്ടു .പതിനെട്ടു ദിവസം കൊണ്ടു പതിനായിരങ്ങൾ മരിച്ചു വീണ മഹാ ഭാരത കഥയിൽ പ്രയോഗിക്കപ്പെട്ട തന്ത്രങ്ങളും കുതന്ത്രങ്ങളും അന്നാമ്മ ചാക്കോയെന്ന വെള്ളികെട്ടിയ തലമുടികളുള്ള അമ്മച്ചി തലങ്ങും വിലങ്ങും പ്രയോഗിച്ചു  . കൊച്ചുമുതലാളി വിട്ടു പോയാൽ കടാപ്പുറത്തു നെഞ്ചു പൊട്ടി ചാകുമെന്നു പുട്ടിന്റെ ഇടയിൽ പീര ഇടുമ്പോലെ ആവർത്തിച്ചിരുന്ന ലിജി കുരിയാക്കോസ് ഇപ്പോൾ പതിയെ കളം മാറി ചവിട്ടി തുടങ്ങിയിരിക്കുന്നു .
പെരട്ടു തള്ളയെ വിളിച്ചു എങ്ങോട്ടെങ്കിലും പോയില്ലെങ്കിൽ മരിച്ചു പോയ മള്ളൂർ വക്കീലിനെ കുഴിയിൽ നിന്നും കൊണ്ടു  വന്നു പോലും ഡിവോഴ്സ് എഴുതി വാങ്ങിക്കുമെന്നു തീർത്തും തീട്ടൂരമിറക്കിയിരിക്കുന്നു  .

നീ പോയാൽ എന്റെ ചെറുക്കനു നിന്നെക്കാൾ തലയും മുലയുമുള്ള  നൂറു സുന്ദരിമാരെ കിട്ടുമെന്നു അന്നമ്മതള്ള പറഞ്ഞ ആ ദിവസം ഞങ്ങളുടെ ദാമ്പത്യം എന്നെന്നേയ്ക്കുമായി അവസാനിച്ചു . തലയും വേണ്ട മുലയും വേണ്ട  വിയർപ്പിന്റെ അസുഖമുള്ള എനിക്കു മേലനങ്ങാതെ തിന്നാൻ സർക്കാർ ജോലിയുള്ള ആരെയെങ്കിലും അമ്മച്ചി കണ്ടത്തി താ എന്നാ അപേക്ഷയ്‌ക്കു മുമ്പിൽ അമ്മച്ചി നീട്ടിയൊരാട്ടാട്ടി .
അബുദാബിയിൽ നിന്നും ചേട്ടൻ അമ്മച്ചിക്കു ചിലവിനുള്ള പൈസ വെസ്റ്റേൺ യൂണിയൻ വഴി അയയ്ക്കും ഞാനും അമ്മച്ചിയും അരമുറുക്കി ആഘോഷിക്കും .

എന്നാലും നിനക്കു മേലനങ്ങി ഒരു ജോലിയെടുത്തു കൂടെ ജോണാപ്പി എന്ന അമ്മച്ചിയുടെ ചോദ്യത്തെ മുപ്പത്തിരണ്ടു പല്ലും വിടർത്തി ഞാൻ വരവേൽക്കും .എന്റെ വിയർപ്പിന്റെ ഗ്രന്ധികളിൽ ചൂടു  രക്തം ഉറഞ്ഞു കൂടുന്നു ലിജി എന്റെ അന്നദാതാവു മാത്രമായിരുന്നില്ല എന്ന തിരിച്ചറിവ് എനിക്കും അവൾക്കും ഒരേ സമയം ഉണ്ടായി തുടങ്ങിയിരിക്കുന്നു.   കാലാവസ്ഥ വകുപ്പിൽ ഇപ്പോൾ കാലാവസ്ഥ ഏറെക്കുറെ ശാന്തമാണ്  .ഞാൻ കാത്തിരിക്കാൻ തയ്യാറാണെന്ന സന്ദേശം അവൾ പ്രധാന വാർത്തകൾക്കു ശേഷമുള്ള കാലാവസ്ഥാ റിപ്പോർട്ട് പറയും പോലെ ശതമാനകണക്കിൽ എന്നെ അറിയിച്ചു  കഴിഞ്ഞിരിക്കുന്നു.

അമ്മച്ചിക്കുള്ള വിസ വന്നാലുടൻ ഞങ്ങൾ വീണ്ടും ഒന്നാവും അമ്മച്ചിക്കുള്ള വിസ വരാൻ അർത്തുങ്കൽ പുണ്യാളനു ലിജി വില്ലും കഴുന്നും ഞാൻ നൂറ്റിയൊന്നു ശയന പ്രദിക്ഷണവും നേർന്നു കാത്തിരിക്കുകയാണ്  ....................


Thursday, 17 August 2017

സണ്ണി ലിയോണും സാനിയ മിർസയും


വിവാഹ ഒരുക്ക സെമിനാറിന്റെ രണ്ടാം ദിവസത്തെ ഇടവേളയിൽ അവളൊന്നു മെരുങ്ങി വന്നെന്നു തോന്നിച്ച സമയത്താണ് അപ്രതീക്ഷിതമായി അവളാ ചോദ്യം എന്നോടു ചോദിക്കുന്നത് .
സാനിയ മിർസയുടെ കളി കാണാറുണ്ടോ ?
ചോദ്യം കേട്ട ഞാനൊന്നു അമ്പരന്നെങ്കിലും അടിയന്തിര ഘട്ടങ്ങളിൽ സഹായത്തിനെത്തുന്ന മിഖയേൽ റേശ് മാലാഖ എന്റെ നാവിൻ തുമ്പിലേയ്ക്ക് ഓടിയെത്തി .
സാനിയ മിർസയോ അതാരാ !!!
പച്ച വെള്ളം ചവച്ചു കുടിക്കുന്ന പഞ്ച പാവവും തനി മൊണ്ണയുമാണ് തന്റെ പ്രതിശ്രുത വരൻ എന്ന തിരിച്ചറിവ് അവളെ സന്തോഷത്തിന്റെ പരകോടിയിൽ എത്തിച്ചെന്നു അവളുടെ ഗൂഢമായ പുഞ്ചിരി എന്നോടു പറയുന്നുണ്ടായിരുന്നു .
സാനിയ മിർസയുടെ അമ്മിഞ്ഞയുടെ താളമാണ് കശുവണ്ടി കളിയും പന്നിമലത്തുമായി തെണ്ടി തിരിഞ്ഞ എന്നെ ടെന്നീസിന്റെ കടുത്ത ആരധകനാക്കിയതെന്ന പരമമായ സത്യം അപ്പോൾ വിളിച്ചു പറഞ്ഞിരുന്നെങ്കിൽ കലങ്ങിപ്പോയേക്കാമായിരുന്ന കല്യാണത്തെക്കുറിച്ചും തക്ക സമയത്തു നാവിൽ വന്നു കയറിയ മാലഖയെപ്പറ്റിയും ഞാൻ അഭിമാനത്തോടെ ഓർത്തു . കല്യാണം കഴിഞ്ഞാൽ സാനിയ മിർസ കളിക്കുന്നത് കാണാൻ കഴിയില്ലല്ലോ എന്ന സങ്കടം എന്നെ കുറച്ചു നിരാശനാക്കിയെങ്കിലും കല്യാണം മുൻ നിശ്ചയപ്രകാരം ഗംഭീരമായി നടന്നു .
2005 ലെ ഓസ്‌ട്രേലിയൻ ഓപ്പൺ ടെന്നിസിൽ നാലാം റൌണ്ട് മത്സരത്തിൽ എട്ടു മുട്ടുന്നത് സാനിയ മിർസയും മരിയാ ഷറപ്പോവയുമാണ് . രണ്ടു പേരുടെയും കളി ഒന്നും കാണേണ്ടതു തന്നെയാണ് എന്നാൽ പുത്തനച്ചിയുടെ സാനിയ വിരോധവും മേലിൽ അവളുടെ കളി കണ്ടു പോകരുതെന്നുള്ള തീട്ടൂരവും നൂറ്റി നാല്പത്തി നാലു പ്രഖ്യാപിച്ച പോലെ നിലനിൽക്കുകയാണ് .രാത്രി പന്ത്രണ്ടര മണിക്കാണ് കളി തുടങ്ങുന്നത് ശ്രീമതി ഉറക്കത്തിന്റെ നാലാം യാമം കടക്കുന്ന സമയം . റിസ്‌ക്കെടുക്കാൻ തന്നെ ഞാൻ തീരുമാനിച്ചു ശബ്ദമുണ്ടാക്കാതെ എഴുന്നേറ്റു നടന്നു സ്വീകരണ മുറിയിലെത്തി മുഴുവൻ ശബ്ദവും കുറച്ചു ടി വി ഓൺ ചെയ്തു . അല്ലെങ്കിൽ തന്നെ ഈ കളിക്കെന്തിനാണ് സൗണ്ട് . റഷ്യൻ സുന്ദരിയും നാടൻ സുന്ദരിയും കൊമ്പു കോർക്കുകയാണ് കണ്ണുകൾക്കിനി വിശ്രമമില്ല .അടി, തിരിച്ചടി, തുള്ളൽ ,കുലുക്കം ,റീപ്ലേ ഏതൊരു സ്പോർട്സ് പ്രേമിയെയും പോലെ ഞാനും കളിയിൽ ലയിച്ചങ്ങനെ ഇരിക്കുമ്പോൾ പിന്നിൽ നിന്നൊരു അലർച്ച !!!
കണ്ണടച്ചു തുറക്കും മുൻപു എന്റെ കൈയ്യിലിരുന്ന റിമോട്ട് രണ്ടു കഷണമായി . ടി വി തല്ലി പൊട്ടിക്കാൻ അവളൊരു ശ്രമം നടത്തിയെങ്കിലും നാളെ സ്ത്രീ സീരിയൽ കാണേണ്ടതാണല്ലോ എന്ന ചിന്ത അവളെ ആ ഉദ്യമത്തിൽ നിന്നും പിന്നോട്ടു വലിച്ചു. സാനിയ മിർസ ആ കളിയിൽ ദയനീയമായി തോറ്റു ,ജീവിത മത്സരത്തിലെ എന്റെയും ആദ്യത്തെ തോൽവി . ഒരാഴ്ച അവളെന്നോടു മിണ്ടിയില്ല സാനിയ മിർസ എന്ന പേര് പോലും എന്റെ രാത്രികാലങ്ങളിലെ ദുസ്വപ്നമായി .
ഇന്നു സണ്ണി ലിയോണിനെ കാണാൻ തിരക്കും തല്ലുമുണ്ടാക്കുന്ന ചെറുപ്പക്കാരെ കണ്ടപ്പോൾ എനിക്കു അസൂയയും കുശുമ്പും കണ്ണുകടിയും പെരുവിരലിൽ നിന്നും ഇരച്ചു കയറുകയാണ് . ചെറുപ്പക്കാരെ ഒന്നു ഞാൻ പറയാം ഒരു കയർ കഴുത്തിൽ വീഴും വരെ മാത്രമേ കാണു നിങ്ങളുടെ ഈ കുന്തളിപ്പ് . അതു കഴിഞ്ഞാൽപ്പിന്നെ നിങ്ങൾ വിശുദ്ധ മൃഗമാണ് എല്ലാവരാലും ആരാധിക്കപ്പെടുന്ന എന്നാൽ ഇറച്ചിക്കു പോലും വിലയില്ലാത്ത വിശുദ്ധ മൃഗം .....