Monday, 27 March 2017

മരുഭൂമി നോക്കും ഉപഗ്രഹം (കവിത )



മരുഭൂമിയിലേയ്ക്ക് മിഴി തുറന്നിരിക്കുന്ന
മനോഹരിയായ ഒരു ഉപഗ്രഹമാണ് മലനാട് .
മനതാരിൽ ഒപ്പിയെടുക്കപ്പെടുന്ന ചിത്രങ്ങളെ
മിഴിവോടെ പറിച്ചു നടാൻ വെമ്പൽകൊള്ളുന്ന നാട്
മരുഭൂമിയിൽ അംബര ചുംബികളുണ്ടായപ്പോൾ
മലനാട്ടിലും എണ്ണ മണമുള്ള കെട്ടിടങ്ങളുണ്ടായി
മരുഭൂമിയിൽ ഷോപ്പിംഗ് ഉത്സവങ്ങൾ ഉണ്ടായപ്പോൾ
ഉത്സവങ്ങളുടെ നാട്ടിലും വന്നു
ഗ്രാൻഡ് കേരളാ ഷോപ്പിംഗ് ഫെസ്റ്റിവൽ
മരുഭൂമിയിൽ മലയാളികൾ രണ്ടാം പൗരൻമ്മാരായപ്പോൾ
മലനാട്ടിൽ ബംഗാളികൾ രണ്ടിലൊന്നു വീതമായി
തിളയ്ക്കുന്ന വെയിലു പേടിച്ചവർ ഉച്ച വിശ്രമം കൊടുത്തപ്പോൾ
താപ നിലയിലെ വ്യതിയാനം നോക്കി നമ്മളും
പാസാക്കിയൊരു പുതിയ നിയമം
മരുഭൂമിയിൽ മഴയ്ക്കു വേണ്ടിയവർ മേഘം പൊടിച്ചപ്പോൾ
മാറിപ്പോയ മഴ മേഘങ്ങൾക്കു വേണ്ടി നാം ഡ്രൈ ഐസു തേടി
ഭൂമി ഉരുണ്ടാതാണെന്നു പണ്ടാരോ പറഞ്ഞതു
പച്ച പരമാർത്ഥമാണെന്നു സമ്മതിച്ചേ മതിയാവു
ഒരിടത്തു നേരം ഇരുട്ടുമ്പോൾ മറ്റൊരിടത്തു നേരം
പര പരാ വെളുത്തു വരുന്നേയുള്ളുവെന്നു ഞാനുറപ്പിക്കുന്നു .
Post a Comment